В то же лѣто пострижеся Святоша князь, сынъ Давыдовъ, в Черниговѣ, тѣсть Всеволожь.

В лѣто 6625 [1117]. Иде Мьстиславъ въ Киевъ на столъ из Новагорода марта въ 17; а сына посади в Новѣгородѣ Всеволода на столѣ.

В лѣто 6625 [1117]. Приведе Володимиръ Мстислава, сына своего, из Новаграда в Киевь, а в Новѣградѣ сѣде Всеволод Мстиславичь.

Въ лѣто 6625 [1117], марта 17, князь Мьстиславъ Володимеричь иде изъ Новогорода кь Киеву, къ отцу, княживъ 22 лѣта по Давыдѣ Святославичи. И дасть ему отецъ Бѣльгородъ, понеже посылалъ по него; а въ Новѣгородѣ посади сына своего Всеволода на столѣ

В лѣто 6627 [1119]. Заложи церковь Кирьякъ игуменъ и князь Всеволод, манастырь святого Георгиа в Новѣгородѣ.

В лѣто 6627 [1119]. Заложи князь Всеволод и игуменъ Кирьакъ церковь камену святого Георгиа манастырь в Новѣгородѣ.

Въ лѣто 6627 [1119]. Повелѣниемъ князя Всеволода Мьстиславича, внука Манамахова, Кириакь игумеиь заложи въ Новѣгородѣ церковь святаго Георгиа, манастырь Юриевъ.

А на весну ходи Всеволод с новгородци на ѣмь, и побѣди; нь лютъ бяше путь, яко купляху по ногатѣ хлѣбъ.

В лѣто 6631 [1123]. Оженися Всеволодъ, сынъ Мьстиславль, в Новѣгородѣ.

В лѣто 6631 [1123]. Ходи Всеволод с новгородци на ѣмь и побѣди я; но лют бяше путь, купляхут хлѣбъ по ногатѣ.

В лѣто 6631 [1123]. Ходи князь Всеволодъв съ новогородьци на ѣмь и победи ихъ.

Женися князь Всеволодъ, сынъ Мьстиславль, в Новѣгородѣ.

Того же лѣта оженися Всеволодъ Мьстиславичь въ Новѣгородѣ.

На ту жь весну ходи Всеволодь съ Новогородци на Имь, и побѣди а; но лють бяше путь, еже купляхуть по ногатѣ хлѣбь.

В то же лѣто посадиша на столѣ Всеволода новгородци.

И посадиша новгородцы у себе Всеволода на столѣ.

Того же лѣта посадиша новогородци Всеволода на столѣ.

Въ лѣто 6633 [1125]. Преставися князь великии Владимеръ, въ Киевѣ, Всеволодичь Манамахъ, внукъ Ярославь, маа 19, княживъ лѣть 13, а живъ всѣхъ лѣть 73. И сѣде по немъ въ Киевѣ сынь его Мьстиславъ, а другыи сынь Ярополкь въ Переяславли; а Всеволодъ Мьстиславичь прииде изъ Новагорода кь отцу вь Киевь.

В лѣто 6634 [1126]. Ходи Всеволод къ отцю Кыеву, и прииде опять в Новъгород на столъ мѣсяца февраля въ 28.

Того же лѣта ходи князь Всеволодъ Мьстиславичь кь отцу въ Киевь, и опять прииде отъ отца, ис Киева, въ Новогородъ, на столъ свои, и посадиша его новогородци на столѣ февраля 28.

В лѣто 6635 [1127]. Заложи Всеволод церковь камену святого Иоана на Петрятинѣ дворищи въ имя сыновне.

В лѣто 6635 [1127]. Заложи церковь камену святого Иоанна Всеволод в Новѣгородѣ, на Петрятинѣ дворѣ, въ имя сына своего.

Того же лѣта князь Всеволодъ Мъстиславичь заложи церковь каменну святого Иоанна, въ Новѣгородѣ, на Петрятинѣ дворѣ, въ имя сыновне. Въ то же время паде метыль густъ по земли и по водѣ по двѣ нощи, а по 4 дни.

В лѣто 6638 [1130]. Иде Всеволод с новогородци на Чюдь зимѣ, в говѣние, и самых исѣче, а хоромы пожже, а жены и дѣти приведе домовь.

И в том же лѣтѣ ходи къ отцю Кыеву.

В лѣто 6638. [1130] Посла Мстислав сыны своа, Всеволода, Изяслава и Ростислава, с дружиною их с новгородци на чюдь; и взяша их и дань възложиша.

В лѣто 6638. [1130] Заточиг князь великии Всеволод князи полотескыя и съ княгинями къ Царюграду.

Того же лѣта сынь его Всеволодъ съ Новогородци ходи на Чудь, и посѣче ихъ, и хоромы ихъ пожже, а жены ихь и дѣти ихъ приведе въ полонь со собою.

В то же лѣто, на зиму, иде Всеволод на Чюдь; и створися пакость велика, и много добрых мужь избиша въ Клинѣ новгородцовъ, генваря въ 23, в суботу.

В то же лѣто ходи Всеволодъ в Русъ Переяславлю, повелѣниемъ Ярополцимъ, а цѣловавъ крестъ к новгородцомъ, яко «Хощю у вас умрети». И рече Юрги и Андрѣи: «Се Ярополкъ, брат наю, и по смерти своеи хощеть дати Киевъ Всеволоду, братану своему». И выгониста ис Переяславля. И прииде опять Новугороду; и бысть въстань велика в людех; и приидоша плесковици и ладожанѣ Новугороду, и выгониша князя Всеволода из города; и пакы, сдумавше, въспятиша и опять Устьяхъ; а Мирославу даша посадницать въ Плесковѣ, а Рагуиловѣ в Ладозѣ.

Того же лѣта ходи Всеволодъ Мьстиславичь изъ Новагорода, повелѣніемъ Ярополчимъ, и посади его въ Переяславли, посылалъ бо по него, а цѣловалъ къ Новогороду кресть, «яко хощу у васъ умрети.» И рекоша братія, Юрій и Андрей: «се братъ нашь Ярополкь по смерти своей хощетъ дати Кіевь Всеволоду Мстиславлю, братану нашему.» И выгониста его ис Переяславля, и пріиде Въсеволодъ опять къ Новогороду; и бысть въстань велика въ людехъ. И пріидоша Плесковичи и Ладожане къ Новугороду, и выгониша князя Всеволода изъ Новагорода; и пакы здумавше възвратиша его Устьяхь; а Мирославу даша посадничество въ Плесковѣ, а Рагуилу въ Ладогѣ. Князь великій же Ярополкь выведе брата Юріа ис Переяславля, и посади въ немъ Изяслава Мьстиславича выведъ ис Полоцка; Полочане же выгнаша отъ себе и брата его Святополка, а посадиша у себе Василка Святославича, внука Владимера. И потомъ князь великій Ярополкь выведъ ис Переаславля Изяслава Мьстиславича, и дасть ему Туровъ и Пинескь, а Переяславль брату своему Вячеславу.

В том же лѣтѣ обновиша мостъ чресъ Волхово, рушивше; и церкви срубиша 2 древяны на Торговищи: святыя Богородица и святого Георгиа, при князи Всеволодѣ.

Того же лѣта, на зиму, иде Всеволодъ с новгородци на Чюдь, и взя город Гюргевъ, на память святого Микифора, февраля въ 9.

В лѣто 6641 [1133]. Иде Всеволод с новогородци на чюдь, и взя град Юрьев, февраля 9.

В лѣт(о) 6641 [1133]. Иде Всеволодъ с новугородьци на чюдь и взя град Юрьевъ, феврал(я) 9.

Того же лѣта обновиша мостъ черезь Влъховъ, рушивше; и церкви срубивше 2 деревяны на торговищи, святыа Богородица и святаго Георгіа, при князи Всеволодѣ.

На ту же зиму иде Всеволодъ съ новогородци на чюдь, и взя городъ Юриевь, февраля въ 9, на память святаго мученика Никифора.

Того же лѣта ходи Всеволод с новгородци, хотя брата своего посадити в Суждалѣ, и воротишася на Дубнѣ опять; и на том же пути отъяша посадничьство у Петрилѣ и даша Иванкови Павловичю. А Изяславъ иде къ Кыеву; и раздрася вся земля Руская.

И в то же лѣто, на зиму, иде Всеволод на Суздаль ратью, и вся новгородчкая область, мѣсяца декабря въ 31; и сташа дние злѣи: мразъ, въялица , страшно зѣло. И бишася на Жданѣ горѣ, и много ся зла створи: и убиша посадника новгородчкаго Иванка, мужа зѣло храбра, мѣсяца генваря въ 26, и Петрила Микулиница, и много добрых мужь, а суждалець болши; и створше миръ, и приидоша опять. И пустиша митрополита Кыеву, мѣсяца февраля въ 10, в мясопустную недѣлю, а на Суждаль идуще, не пустиша его, а онъ молвяше имъ: «Не ходите, мене Богъ послушаеть». И, пришедши, даша посадничьство Мирославу Гюрятиничю.

А на зиму иде Всеволод на Суждаль ратью и вся Новгородскаа область. И сташа дние зли: мраз, вьялица. И бишася на Жданѣ горѣ, и много зла створися: и убиша посадника новгородского Иванка, мужа храбра зѣло, генваря 26, и Петрила Микулинича, и много добрых мужеи, а суждалець того боле. И створше миръ, и приидоша в домы своя. И пустиша митрополита к Киеву, февраля 10, в мясопусную неделю, а на Суждаль идуще, не пустиша его, а онъ молвяшет: Не ходите, мене Богъ послушает.

В то же лѣто заложи Всеволод съ архиепископомъ Нифонтом церковь камену святыа Богородица на Торговищѣ.

В лѣто 6642 [1134]. Иде Всеволодъ на Суздаль ратью и вся Новогородьская область, и бишася на Жданѣ горѣ. И много ся зла створи, и убиша посадника Иванка, мужь храборъ зѣло, и Петрила Микулинича, и иных мужь много побиша добрых, и суздалцев паде боле. И створиша миръ, и приидоша опять. И пустиша митрополита Киеву мѣсяца февраля 10, в мясопустную недѣлю. А на Суздаль идучи, не пустиша митрополита, а онъ молвилъ: «Не ходите на Суздаль, мене Богъ послушаетъ».

Того же лѣта ходи Всеволодъ съ новогородци кь Суздалю, хотя брата своего посадити на Суждалѣ; и воротишася з Дубны, а Изяславь иде кь Киеву. Тогда отъяша посадничьство у Петрила и даша Ивану. И раздрася вся земля Рускаа.

В то же лѣто заложи в Новѣгородѣ князь Всеволод со архиепископомъ Нифонтомъ церковь камену святыя Богородица на Торговищи.

Тои же зимы Всеволодъ Мьстиславичь иде на Суждаль и Ростовъ ратию, а съ нимъ вся Новогородскаа область, и сташа дние зли, мразъ и въялица страшень зѣло; они же съвокупившеся срѣтоша ихъ на Жданѣ горѣ, и ту бишася, и много ся зла сьтвориша. Ту убиша посадника Иванка, мужа храбра зѣло, и Петрила Микулинича, и многыхъ добрыхь мужеи побиша; а суждалцевь пало болѣ. Всеволодъ же бѣже къ Новогороду, а новогородци съ суждалци сътворше мирь, приидоша опять посрамлени. И пустиша митрополита Михаила къ Киеву, мѣсяца февраля въ 10, а на Суждаль идучи не пустиша его; а онъ молвяше имъ: «Не ходите, мене Богъ послушаетъ.» И приидоша, даша посадничьство Мирославу Горятиничу.

Того же лѣта Всеволодъ Мьстиславичь и владыка Нифонть заложи въ Новѣгородѣ церковь каменну на торгу.

В лѣто 6644 [1136]. Новгородци призваша плесковиць и ладожанъ и сдумаша, яко сгонити князя своего Всеволода, и всадиша и въ епископль дворъ с женою и сдѣтьми и с тѣщею, мѣсяца маия въ 28; и сторожѣ стрежаху въ день и нощь 30 муж съ оружиемъ. И сѣдѣ 2 мѣсяца, и пустиша из города июля въ 15, а Володимира, сына его, прияша. А се вины его творяху: 1, не блюдет смердъ; 2, «чему хотѣлъ еси сѣсти въ Переяславли»; 3-е, «ѣхалъ еси с полку предѣ всѣх, а того много; на початыи велѣвъ ны ко Всеволодку приступити, а пакы отступити велит»; и не пустиша его, донелѣже инъ князь будеть.

В то же лѣто стрѣлиша князя милостьницѣ Всеволожи, но живъ бысть.

В лѣто 6644 [1136]. Новгородци призвашя пскович и ладожанъ и здумашя изгонити князя своего Всеволода, и всадиша и въ епископль дворъ с женою и с дѣтми, и с тещею, маиа 28; и стражие стрежаху день и нощь, 30 мужь на день, съ оружием. И сѣдѣ 2 месяца, и пустиша и из града, а Володимира, сына его, приашя. А се его вина: пръвое, не блюдет смеред; второе, хотѣл сѣсти в Переяславли; третие, ѣхал еси с полку преже всѣх; велѣвь нам къ Всеволодку приступити, и пакы отступить велит. И не пустиша его, доколѣ инъ князь будет.

И прииде к Новуграду князь Святослав Олгович из Чернигова от брата Всеволодка, а Всеволода выгнаша новгородци от себе; он же прииде к строеви своему Ярополку к Киеву, и да ему Вышегород; и сѣде ту лѣто едино.

В лѣто 6644 [1136]. Новогородьци призваша пьсковичь и ладожанъ и здумавше, яко изгонити князя своего Всеволода, и всадиша и въ епискупль дворъ съ княгинею и съ боляры, и с тещею маия въ 28, и сторожи стрежааху день и нощь по 30 мужь съ оружиемъ. И сѣдѣвъ 2 месяца, испустиша из града 15, а Владимера, сына его, прияша. А се вины его творяаху: 1-е, не блюдеть смердов, 2-е, чему хотѣлъ еси сѣсти в Переяславлѣ, 3-е, ѣхалъ еси ис полку напередъ всѣхъ, а того много на початы, и повелѣв ны къ Всеволодку приступити, а пакы отступити велить». И не попустиша его, донелѣже инъ князь будеть.

И прииде Новугороду князь Святославъ Олговичь изъ Чернигова от брата Всеволодька, а Всеволода выгнаша новогородьци от себе. Он же прииде къ стрыеви своему Ярополку къ Киеву, и да ему Вышегородъ, и сѣде ту лѣто едино.

Въ лѣто 6644 [1136]. Новогородци призваша плесковичи и ладожане, и здумаша яко изгонити князя своего Всеволода; и всадиша его въ епископь дворь, съ женою, и з дѣтми и съ тещею, и сторожи стрежаху его день и нощь, по 30 мужеи сь оружиемь; и пустиша его изъ города, а Володимера сына его приаша. А се выны его творяху: 1, не блудеть смердовь; 2, чему хотѣль еси сѣсти въ Переяславлѣ, а къ намъ цѣлова кресть? 3, ихалъ еси изъ полку напередъ всѣхь, а отъ того много ны потяты; и велѣвь ны, рече, къ Всеволодку приступити, а пакы отступити велитъ; и не пустиша его, дондеже инь князь приидеть.

Того же лѣта прииде въ Новгородъ князь Святославъ Олговичь, ис Чернигова, отъ брата Всеволодка, мѣсяца июля 19 день, въ недѣлю; а Всеволода выгнаша. Онъ же прииде кь Киеву, и дасть ему князь великии Ярополкь Вышегородъ.

Тогда же стрѣлиша князя милостинници Всеволожи, и живъ бысть

В лѣто 6645 [1137]. Настанучю мѣсяца марта въ 7, бѣжа Костянтинъ посадникь ко Всеволоду, инѣхь добрых мужь нѣколко; и вдаша посадничьство Якуну Мирославицю въ Новѣгородѣ.

В то же лѣто прииде князь Мьстиславич Всеволод въ Плесковъ, хотя сѣсти в Новѣгородѣ опять на столѣ своем, позванъ отаи новгородчкыми мужи и плесковици, приятели его: «поиди, княже, тебе хотять опять». И яко услышано бысть се, яко Всеволод Плесковѣ с братом Святополкомъ, и мятежь бысть великъ в Новѣгородѣ: не въсхотѣша людье Всеволода; и побѣгоша друзии къ Всеволоду Плескову, и взяша на розъграбление домы их, Костянтинъ, Нѣжатинъ, инѣхъ много, и еще же ищуще то, кто Всеволоду прияеть боляръ, то имаша на них с полторѣ тысяцѣ гривенъ, и даша купцѣ крутитися на воину; досягоша и не виноватых. Потом же Святославъ Олговиць совокупи всю землю Новгородчкую, и брата своего Глѣбька, куряны с Половци, идоша на Плесковъ прогонити Всеволода. И не покорѣшася плесковици имъ, ни выгнаша от себе князя, но бяхуть ся устреглѣ, засѣклѣ осѣкы всѣ; и сдумавше князь и людье на пути, въспятившеся на Дубровнѣ, и еще рекше: «не проливаите крови съ своею братьею, неглѣ богъ како управит своимъ промысломъ».

Тогда же преставися князь Всеволод Мьстиславиць мѣсяца февраля въ Плесковѣ, и яшася плесковици по брата его Святополка; и не бѣ мира с ними, ни суздалци, ни смолняны, ни с полочаны, ни с кыяны. И стоя все лѣто осминка великая по 7 рѣзанъ.

В лѣто 6645 [1137]. Прииде князь Всеволод Мстиславлич въ Псков, хотя сѣсти в Новѣградѣ опять на столѣ, позванъ отаи новогороцкими мужи и псковичи, Жирятою и приатели его, ркуще: Поиди, княже, хотят тя опять. И услышано бысть се, яко Всеволод въ Псковѣ з братом Святоплъком, и мятеж бысть велик в Новѣграде; не въсхотѣшя людие Всеволода, и инии побѣгошя къ Всеволоду въ Псков, и взяша на разграбление домы их, Констянтин Нѣжатин и иных много, и еще же ищуще, то кто Всеволоду приает боляръ, то имашя на них куны с полуторы тысящи гривну, и дашя купцемь крутитися на воину, но сягоша и невиноватых. Потом же Святослав Олгович съвокупи всю землю Новгородскую и брата своего Глѣбка, куряны с половци, идошя на Псков прогонити Всеволода. И не покоришася псковичи им, и выгнашя от себе князя, но бяху устрегли, засѣкли осѣки вси. И сдумавше князь и людие на путь, въспятившеся на Дубровнѣ, и еще рекше: Не проливаите крови с своею братиею, негли Богъ како управит своим промыслом.

Тогда же преставися князь Всеволод Мстиславлич, внук Володимирь, месяца февраля 11, в четверток сыропуст, въ Псковѣ, и положиша и в церкви святыа Троица в день неделныи, юже бѣ сам създалъ. И яшася псковичи по брата его Святоплъка; и не бѣ мира с ними, ни з суждалци, ни з смолняны, ни с полочаны, ни с кианы, и стоаше все лѣто. И купиша осминку по 7 рѣзан.

Тогои жо льта прьидь князе Всьволод Мьстиславич въ Пьсковъ, хотя сьсти во Новѣградѣ опять на столѣ своемъ, позваю отаи новогородскими мужи и пльсковичи, Жирятою, приятьли его: «Поиди княжеэ, опять тьбь хотять». Яко услышанъ бысть си, яко Всьволод въ Пьсковѣ съ братомъ Святополкомъ, и мятьжь бысть вьликъ в Новѣгородѣ, нь восхотьша людие Всьволода и побѣгоша ови къ Всьволоду въ Песковъ, и взяшя на разъграбльние домы ихъ, Къстянтинъ Бьжатинъл и иныхъ много. И ещо жо ищущи того, кто Всьволоду приятьнъ бояръ, поимаше на них куны по полуторѣ тысячи гривенъ и даша купцемъ крутитися на воину; носягоша и невиноватых. Потом же Святославъ Олговичь совокупи всю землю Новогородьскую и брата своего Глѣбка куряны с половци, идоша на Пьсковъ прогонити Всеволода. И не покоришася пьсковичи имъ, и выгнаша от себе князя, но бяхуть устерегли, засѣкли осѣки всѣ. И здумавше князь и вси людие на пути въспятившися, на Дубровнѣ, и еще рекше: «Не проливаите крови съ своею братьею, негли богъ како управить своимъ промышлениемъ».

Тогда же преставися князь Всеволодъ Мьстиславичь, внукъ Владимерь, месяца февраля 11 въ Пьсковѣ, и положиша и въ святѣи Троицѣ, юже бѣ самъ и создалъ. И яшася плесковичи по брата его Святополка, и не бѣ мира с ними, ни съ суздалци, ни съ смолняны, ни с полочаны, ни с кияны, и стоя все лѣто.

Въ лѣто 6645 [1137]. Мѣсяца марта 7, бѣжа Костянтинь посадникъ къ Всеволоду, и инѣхъ добрыхъ мужь нѣколико, и даша посадничество Якуну Мирославичу.

Того же лѣта прииде князь Всеволодъ Мьстиславичь изъ Вышегорода ко Пьскову, позвань Новогородскыми и Пьсковьскыми мужи, отаи, приатели его: «Поиди, княже, яко тебе хотятъ опять». Онъ же, хотя опять сѣсти на столѣ своемь, поиде изъ Вышегорода съ братомъ Святополкомъ, и проводи ихь до Плескова Василко Полотцкии. Идущу ему мимо Полотескь, самъ выиха къ нему и проводи его сь многою честию, заповѣди же ради Божиа забы злобу отца ихъ Мьстислава, что бяшеть сътворилъ всему роду его; вшедшу ему въ руцѣ его, къ нему, и ничтоже о немь лукавно помысли, якоже подобаше человѣческому естеству; но и кресть межи собою цѣловаста, яко не поминати что ся удѣало вь прьвое; на всю правду дався, и тако добрѣ проводи его. И яко услышано бысть се, яко Всеволодъ вь Пьсковѣ съ братомъ Святополкомъ, и бысть мятежь великь въ Новѣгородѣ, не хотяше людие Всеволода; и побѣгоша друзии кь Всеволоду въ Пьсковь, и взяша Новогородци на разграбление домы ихь, Костантинь, Нѣжатинь и иныхъ много; еще же ищуще кто кь Всеволоду приаеть боярь, то имаша на нихъ куны съ полторы тысящи гривень, и даша купцемъ крутитися на воину, но сѣгоша невиноватыхъ. Потомъ же Святославь Олговичь съвокупи всю землю Новогородскую, и брата своего Глѣбка приведе съ куряны и съ половци, и идоша на плесковъ прогонити Всеволода; и не покоришася имъ Плесковичи, ни выгнаша князя отъ себе, но бяхуть ся устерегли, засѣкли осѣкы вси. И здумавь князь и людие его на пути, въспятишася на Дубровнѣ, рекши: «Не проливаите крови съ своею братиею, негли Богь како управитъ своимъ промысломъ».

Тогда же преставися князь Всеволодъ Мьстиславичь вь Пьсковѣ, внукь великого князя Володимера Манамаха, февраля 11 день, въ четвертокь масленыа недѣли; а въ недѣлю положень бысть во церкви святыа Троица, юже създаль самъ, въ придѣлѣ святаго Благовѣщениа, на лѣвои странѣ, и поставиша надъ нимъ его мечь, иже и донынѣ стоитъ, видимъ всѣми. И пьсковичи же яшася по брата его Святополка Мьстиславича; и не бѣ мира съ ними, ни сь суждальци, ни съ смолняны, ни съ полочаны, ни съ кианы Новогороду; и стоа все лѣто осминка ржи великаа по 7 рѣзань.

В лѣто 6647 [1139]. Прииде князь Юрги из Суздаля къ Смоленьску и зваше новгородцовъ на Киевъ на Всеволодка, и не слушаша его. И тогда бѣжа Ростиславъ къ Смоленьску къ отцю изъ Новагорода, септября въ 1, сѣдѣвъ лѣто и 4 мѣсяци; и разгнѣвася Юрги, идя опять къ Суздалю и взя Новыи торгъ. И послаша новгородци къ Киеву по Святослава по Олговица, заходивше ротѣ; и бѣ мятежь в Новѣгородѣ, а Святослава долго не бяше.